Un partíu especial... pa los hondureños

Méritos aparte del equipu asturianu tamién hai qu'agradecé-y el trabayu al rival. Honduras vieno a xugar en serio, tolo contrario que l'otru añu contra Lituania, y mientres que demostró tener un ataque curiosu, nel que rescampló Saul Martínez polos tres goles y pol xuegu, la defensa foi bastante feble, sobremanera pel medio, lo que favoreció l'ataque asturianu, que remachó a los americanos a balón paráu. En dellos aspectos, parez que los visitantes tomaron el partíu más en serio que los asturianos.

El seleccionador hondureñu José de La Paz "Chelato" esplicó depués en rueda de prensa qu'Honduras ta iguando un equipu mozu con vista a la Olimpiada, colo que quixo disculpar ente la prensa hondureña los fallos de defensa. "Chelato" emponderó muncho a los xugadores asturianos, y demostró que los conocía perfectamente, esplicando les característiques de xuegu de los más importantes e la selección astur. Pela sala de prensa del estadiu Suárez Puerta pasaron tamién el técnicu asturianu y les autoridaes de dambos países. Mientres Álvarez Areces y Novoa solliñaron l'esitu de la fiesta de l'asturianía y del deporte asturianu, la intervención de la ministra de deportes y cultura dio-y un aquello menos distante a la rueda de prensa, despidiéndose con un "Puxa Asturies" que nun se sabe onde-y deprendieron. Otramiente, ente la bayura de grandes xugadores asturianos que trabayen n'equipos de fuera rescampló la Abelardo. Agradable en tola rueda de prensa, el defensa del Alavés tuvó un xestu de sorna al marchar corriendo cuando-y entrugaron pelos bilordios del so antiguu equipu, el Barcelona.

La prensa hondureña, que mandó unviaos especiales a cubrir el partíu, dio abonda información d'esti. Pues ver los artículos de La Tribuna Tiempo y La Prensa, tres de los periódicos más importantes del país.