Un padre d’un alumnu de Llugones sufre un casu nuevu de discriminación por usar l’asturianu

Iniciativa pol Asturianu ta acabante de facer públicu un casu de discriminación nuevu que se dio nel IES Astures, de Llugones. El padre d’un alumnu sufrió despreciu al facer un trámite n’asturianu y viose obligáu a presentar un documentu tamién en castellanu.

“L'asturianu nun ye oficial” foi ún de los argumentos que-y dio un trabayador del centru pa nun almitir un papel en llingua asturiana nel pasáu mes d'abril. El padre, que treslladó’l so casu a Iniciativa pol Asturianu p’algamar asesoramientu, llamentó tamién un tratu agresivu dende la secretaría del centru públicu.

Esti casu nuevu de discriminación y de desconocimientu de la llegalidá dase cuando ta espoxigando en redes sociales un movimientu de denuncia baxo l’emplegu de la etiqueta #Pasóme. Son yá decenes los usuarios que tán contando dalgunes de les esperiencies vivíes na escuela, cola Alministración o nel so día a día por emplegar la so llingua materna con normalidá.

“Dende Iniciativa pol Asturianu recordamos qu'estes situaciones nun se daríen si la llingua asturiana tuviera l'estatus d'oficial y animen a denunciar estos casos a los y les asturianes”, espresen nun comunicáu.