Un osu adultu fina tres quedar atrapáu por un llazu en Cangas

Los téunicos de la Conseyería d’Agroganadería y Recursos Autóctonos nun pudieron salva-y la vida a un osu adultu atrapáu por un llazu d’aceru cerca de Santianes. La Fundación Oso Pardo (FOP) solicita una investigación pa dar col culpable.
 
Según esplicó esta organización nun comunicáu, el guarda de la Sociedad de Cazadores El Narcea, José Manuel Antón, alcontró al animal nun camín ente piornales cerca del pueblu de Santianes (Cangas del Narcea) y dio avisu a la fundación. Pronto llegó un vixilante del FOP y dambos comprobaron que l’osu taba vivu, manteniéndose sollertes a distancia hasta que más tarde llegó l’equipu de rescate, coordináu por un téunicu de la conseyería y formáu por veterinarios, guardes, téunicos y dellos miembros del Seprona de la Guardia Civil. Nel momentu de la intervención, los téunicos d’Agroganadería vieron al animal mui debilitáu, tanto pol tiempu que permaneció atrapáu na trampa como poles firíes que’l llazu provocó-y na pata delantera izquierda y les condiciones climátiques, nun pudiendo facer nada pola so vida. El cuerpu del osu treslladóse a Uviéu, onde nos díes próximos va prauticase una necropsia que permitirá conocer les causes de la muerte del animal con una exautitú mayor.
 
Dende Agroganadería y Recursos Autóctonos llamentaron y condenaron la muerte del exemplar, y apuntaron que los avances rexistraos na recuperación "d’una especie emblemática como l’osu pardo cantábricu nun se pueden ver amenazaos por aiciones illegales como la colocación de llazos, qu’en nada beneficien a la xestión de la naturaleza y que suponen una aición insolidaria col conxuntu de la sociedá". Mentes, la FOP solicita al Seprona una investigación profunda que permita identificar al responsable de la colocación del llazu y que, nel casu de que dea resultaos, va personase pa que "sobre esti individuu caiga la llei con tol so pesu”. La fundación señala qu’en marzu d’este añu llocalizó 14 lazos illegales nun monte oseru de Cangas del Narcea y que dende’l 1993 y hasta la fecha les sos patrulles retiraron un total de 1.504 llazos na Cordillera Cantábrica. Amás, denunció a 18 tramperos, cinco d’ellos n’Asturies, sorprendíos mentes colocaben o revisaben los llazos.