Un llibru recueye 'Xuegos tradicionales asturianos' de la década de los 50

Elena Victoria Marta Fernández Poch y los hermanos Rubén y Xuan Xosé Sánchez Vicente son los responsables d'esti trabayu con ilustraciones de Ruma Barbero.

Xuegos, cancios y recatafiles d’escoyer tán recoyíos nel llibru 'Xuegos tradicionales asturianos', de la Fundación Nueva Asturies, editáu por Trabe. Son tolos que tán na memoria de los trés autores de la obra, nacíos ente'l 1949 y el 1951, que traen al papel entretenimientos de les neñes y neños de la época que va del 1953 al 1960, al suponer "que los sos recuerdos de xuegos activos vienen de los cuatro o cinco años hasta los diez o once".

Nacíos en Xixón y criaos n'El Llano del Mediu y El Bibio, Fernández Poch y los Sánchez Vicente consultaron a otres persones tanto p'ampliar l'ámbitu xeográficu como p'ayudar a reconstruyir la memoria d'aquellos años. El resultáu final ye 'Xuegos tradicionales asturianos', "un llibru bien documentáu y prácticu, que tien amás 'el plus' de les guapísimes ilustraciones a color de Ruma Barbero", que se divide en once estayes: 'Xuegos de movimientu', 'Xuegos de coru o movimientu llimitáu', 'Xuegos con oxetos', 'Xuegos con balón, 'Lluches', 'Xuegos con neños pequeños', 'Dellos cancios del corru y de la comba o que xugaben los pas colos fíos', 'Cancios y fórmules d’escoyer', 'Cancios de campamentu y escursión' y 'Traballingües'.

La presentación d'esta obra va tener llugar esta tarde, a les 19 hores, nel salón d'actos del xixonés Centru de Cultura Antiguu Institutu. Los asistentes van recibir un llibru de baldre, hasta fin d'esistencies disponibles pal eventu.