Un institutu xixonés presiona a un alumnu pa que nun se matricule en Llingua Asturiana

Iniciativa pol Asturianu denuncia que l’IES Rosario Acuña, de Xixón, ta presionando a una familia pa que’l so fíu nun se matricule en Llingua Asturiana. Recibió una llamada pa evitar qu’escoyera esta opción por ser supuestamente l’únicu apuntáu en Bachilleratu.

“Un cursu más dende Iniciativa pol Asturianu siguimos recibiendo denuncies de families que dan lluz sobre les práctiques illegales qu'entá esisten en dellos centros educativos d'Asturies y qu'amenorguen la presencia de l'asignatura d'asturianu”, apunten dende la organización. Nesta ocasión ye la direición del Rosario Acuña la que trata de poner torgues a un alumnu que llevar cursando Llingua Asturiana mientres tol so procesu educativu.

“La familia recibió una llamada presionando pa que nun se matriculare al menor, al ser el so fíu, según el centru, l'únicu alumnu matriculáu na asignatura en Bachilleratu, presionando pa que cambiare la so elección. Recibida la denuncia, n'Iniciativa pol Asturianu asesoremos a la familia sobre la normativa vixente, y tres informar al centru y dar avisu de que s'interpondría una denuncia, a la fin almite la matriculación del alumnu”, esplica.

El coleutivu que trabaya pola normalización del idioma en tolos ámbitos recuerda a les families “que pasen per procesos asemeyaos a ésti, que munches vegaes nun denuncien, que ye importante dalos a conocer y que tienen drechu a que los sos fíos estudien asturianu en tolo niveles”. Igualmente critica la situación de la materia en Bachilleratu “onde la Conseyería d'Educación recortó de 4 a 1 hora selmanal l'asignatura, faciendo que garrala suponga tener qu’escoyer otres materies complementaries que completen l'horariu. Esiximos a la conseyería que recupere les cuatro hores nesti nivel y que la inspección faiga'l so trabayu y vixile que nun asocedan casos como'l denunciáu”.