Un informe de Naciones Xuníes sitúa'l númberu de refuxaos en 43,7 millones

Esti llunes celébrase’l Día Mundial del Refuxáu col oxetivu de concienciar a la población sobre la situación de les persones desplazaes pola situación nel so país d'orixe. A finales del 2010, nel planeta había 43,7 millones de refuxaos.
 
L’informe de l’Altu Comisionáu de Naciones Xuníes pa Refuxaos (ACNXR) ‘Global Trends’ del 2010 dexa esta cifra tán alarmante, yá que supón la más alta de los 15 años últimos: 15,4 millones de refuxaos acreditaos, 27,5 millones de desplazaos internos y 850.000 demandantes d’asilu. De tolos refuxaos, el 80 por cientu tán exiliaos en países en víes de desarrollu, mentes que namái’l 20 por cientu ta en países desarrollaos. Un datu qu’amuesa que, pese al llaváu de manes que quier facer occidente en munches ocasiones, como ta asocediendo colos refuxaos llibios por mor del conflictu d’esti país norafricanu, los que al final tomen la responsabilidá nestos casos son los probes.
 
El país más receptor de refuxaos ye Pakistán, con un 1.900.600 de persones asitiaes nel so territoriu, siguíu por Irán (1.073.400) y Siria (1.005.500). En cuarta posición tal primer estáu desarrolláu, Alemaña, con 594.300 refuxaos –n’Europa’l númberu de total ye de 1,6 millones–. Nel lláu contrariu, Palestina ye’l país col grupu mayor de persones fuera de la so tierra, yá que suma 5 millones de persones –nel informe d’ACNXR esti datu nun apaez por tar atendíos por una axencia especial de la ONX–. Los afganos (3.054.700) y los iraquíes (1.683.600) siguen a los palestinos nesta llista ‘prieta’.
 
El lema d’esta xornada, que se vien celebrando dende’l 2001, ye nesta ocasión ‘Ponte nos zapatos d’un refuxáu y da’l primer pasu pa entender la so situación’. ACNXR quier centrar l’atención “na situación de los refuxaos y solicitantes d’asilu tanto nes zonas urbanes como nes comunidaes de frontera pequeñes, onde lluchen por integrase nes sociedaes d’acoyida pa conseguir un emplegu y l’accesu a los servicios básicos, como salú o educación, munches veces enfrentándose a la discriminación y la xenofobia”. Esta invitación “ye un llamáu a desafiar la intolarancia y la indiferencia hacia persones que pa salvar les sos vidas perdiéronlo too, menos la determinación de volver a empezar”.