Un grupu de tresporte inglés puya por ALSA

La multinacional inglesa del tresporte National Express podría fusionase con ALSA.
Pel momentu les dos empreses nieguen que vaya producise la fusión pero reconocen qu'anden en tratos pa ello.


Dambes compañíes reconocieron la esistencia de negociaciones ente elles con vistes a una futura fusión, anque pel momentu nun hai nada zarrao sobre'l tema. Ello ye que mientres les fontes d'Alsa apurrieron a los medios de comunicación asturianos la idea de negativa a que se plantegare la venta, falándose d'un posible alcuerdu "d'integración" pa que d'ello guañare un gran grupu intermodal con presencia en toa Europa, dellos medios ente los que s'adelantó l'Axencia Reuters, daben ayeri la noticia de que National Express ficiere una ufierta por importe de 250 millones de llibres pola empresa asturiana. La empresa inglesa trancó pel momentu la cuestión con un comunicáu en qu'asegura que pel momentu nun hay alcuerdu y qu'esti, en casu de producise, asoleyarase nel so momentu. La posible venta d'ALSA , empresa totémica na economía asturiana, llevó a posicionase al Gobiernu asturianu, que per boca de la so portavoz Ana Rosa Migoya aseguró que "Al gobiernu asturianu cónsta-y que la familia Cosmen nun va vender la empresa Alsa".

ALSA ye ún de los axentes mayoritarios nel negociu del tresporte per carretera n'España. Con 2.860 empleaos y una flota de 1.259 coches, esta empresa dedicada al tresporte per carretera con autocares dende primeros del sieglu XX tuvo'l so aniciu nel sector del tresporte nel añu 1728, cuando la familia Cosmen llevaba servicios de coches de caballos pel occidente asturianu. Dende la creación d'ALSA nel añu 1923 la so erspansión foi constante, rescamplando l'apertura de linies internacionales (Asturies - Bruseles) nel 1964, anque'l saltu entamó nos años 80, cuando ALSA entamó a operar en China. La empresa dio otru gran pasu que l'asitió como líder n'España nel 1999, cuando l'Estáu-y alxudicó la privatización de la empresa estatal de tresporte per carretera ENATCAR. Esi mesmu añu ALSA asitióse en Marruecos, llevando la xestión de los autobuses de Marrakech, mientres que l'añu dempués ALSA cruzaba'l charcu al facese col tresporte urbanu de Santiago de Chile. N'abril del 2005 un grupu hispano-portugués nel que taba enxerta ALSA ganó'l concursu de privatización de la empresa pública d'autobuses d'Alemaña Deutsche Touring GmbH.

Pela so parte, el grupu ingles National Express, con sede en Birmingham, creose nel añu 1973 como un gran operador estatal públicu de tresporte per carretera. Privatizáu nel añu 1988, cotiza na bolsa de Londres dende 1992 y ye ún de los axentes más importantes nel negociu del tresporte nel Reinu Uníu, representando por volume de negociu y por diversificación un xigante muncho mayor que la empresa asturiana. Con una plantiya de más de 43.000 tabayadores, National Express ye'l mayor operador de tresporte per carretera n'Inglaterra, pero amás d'ello dende la lliberalización del ferrocarril esti grupu controla'l 30% del tráficu de trenes d'Inglaterra y dellos servicios de metro. A escala asemeyada funciona la so filial norteamericana de tresporte escolar, que tien una plantiya de más de 22.000 trabayadores, operando en 31 estaos de la Unión y dos del Canadá, ello aparte de llevar la xestión del primer aeropertu privatizáu de los EEUU, el Stewart International Airport nel Estáu de Nueva York.