Un grupu de families crea una plataforma pa velar por que s’ufierte asturianu na etapa de 3 a 6 años

Tres el fin del periodu de matriculaciones n’Infantil y dada la situación que vive la materia de Llingua Asturiana, un grupu de families ta acabante de crear la Plataforma pol Asturianu na Educación Infantil 3-6 (PAEI). Non tolos centros ufiértenla pese a lo que marca la Llei d’Usu y Promoción del Bable/Asturianu.

L’asignatura de Llingua Asturiana dábase nos centros hasta’l cambiu del currículu d’Infantil que dexó a la materia nel llimbu y que debería correxir la modificación del Decretu 85/2008, de 3 de septiembre, pol que s’establez el currículu del segundu ciclu d’Educación Infantil (EI) qu'aprobó Conseyu Escolar del Principáu d’Asturies (CEPA) l'añu pasáu y que debía asegurar que los alumnos de 5 años tuvieran la ufierta de la materia nel cursu 2018-2019, dalgo que nun se cumplió. Dende aquel momentu dalgunes escueles siguieron calteniéndola, mientres qu’otres dexaron d’impartila impidiendo asina los escolinos el dar asturianu nuna etapa clave de la so formación.

“Hai munches escueles (les más d'elles) que tán incumpliendo’l mandatu llegal y que nun nos permiten exercer un derechu que tenemos según la Llei d'Usu y Promoción del Asturianu, vixente n'Asturies dende hai 20 años. Otres munches escueles asturianes sí cumplen la llei y ufierten de forma voluntaria l'asignatura”, espliquen dende la PAEI, que naz p’axuntar a les families afeutaes y facer presión conxunta pa solucionar esta situación de cara al cursu viniente y nun dexar asina a nenguna neña o neñu ensin dar Llingua Asturiana na escuela.

Ente los planes previstos ta aconceyar cola Conseyería d’Educación y Cultura, amás de colos centros y los sindicatos educativos. Al empar, afalen a les families afeutaes a que contauten con ellos pa tresllada-yos los sos casos, pa lo que cuenta con una páxina en Facebook.