Un grupu d’asturianos desplázase a Bermeo pa recibir al barcu de la III Flota de la Llibertá

El Comité de Solidaridad con la Causa Árabe entamó un autocar que salió esti martes de Xixón pa recibir a la so llegada a Bermeo al ‘Estelle’, veleru que viaxa hacia Gaza. Los asturianos lleven sidra y quesos del país a Euskadi.
 
La hora prevista de llegada d’esti barcu componente de la III Flota de la Llibertá a la población bizkaitarra son les 16 hores. Al igual qu’asocedió’l domingu en Donosti, ta preparáu un recibimientu per tolo alto a la tripulación del ‘Estelle’, botáu nel 1985 y mercáu esti añu pola iniciativa ‘Rumbu a Gaza’ pa dar a conocer el bloquéu que vive esta rexón palestina y la situación na que ta la so población. Nesta ocasión, la intención nun ye la de llevar ayuda humanitaria a la zona, como nes dos flotes anteriores, sinón dar a conocer qué ye lo que ta pasando en Palestina y, en concreto, en Gaza al traviés de charres, concentraciones y actividaes. Sicasí, al mesmu tiempu, ta en marchu un proyeutu nomáu ‘Arcu de Gaza’ que va tratar de frayar el bloquéu dende dientro sacando productos palestinos en direición a dellos estaos europeos.
 
La delegación asturiana desplazada a Bermeo ta formada por dellos coches particulares y un autocar onde tamién viaxa la Charanga Ventolín, que va dar color al recibimientu a la tripulación del ‘Estelle’. Tres el desembarcu, va tener llugar una manifestación hasta l’ayuntamientu, onde ta previstu un actu solidario. Amás, los asistentes a esta marcha contra’l bloquéu israelín van poder disfrutar de la sidra y los quesos asturianos que van llevar a Euskadi los miembros del Comité de Solidaridad con la Causa Árabe y otres organizaciones del país que van participar na marcha.
 
Parada próxima, Aspe
 
Tres salir de Bermeo, el veleru que partió esti mes de Suecia va tomar rumbu hacia Alacant, onde ta prevista la siguiente parada solidaria nos puertos d'Alacant y Santa Pola. Tres la so llegada, va celebrase un conciertu'l 7 de setiembre a beneficiu de ‘Rumbu a Gaza’ nel auditoriu Alfredo Kraus d'Aspe del grupu rock andaluz Reincidentes, La Rue, La Terapia Mestiza y Alkayata.
 
Na semeya, un momentu de l'actuación de Navil Mansour y Aitzol eta Mikel 'Arramazka' na cubierta del 'Estelle' el domingu nel muelle de Donosti.