Un grupu asoleya una versión bossanova del himnu d'Asturies

Circo Prize ye'l proyectu musical del compositor, productor y guitarrista Luis Rico y el so hermanu l'escritor Javier Rico. Dos mozos asturianos que lleven unos años viviendo en Madrid, onde grabaron los temes del so primer discu "Circo Price" que garra'l nome d'un famosu circu ambulante español.

Luis Rico, que tien trabayao con xente como Alejandro Sanz, Enrique Morente, Nacho García Vega, Juan Carlos Calderón o Niña Pastori, echó mano de les lletres del so hermanu p'asoleyar diez histories distintes cantaes en castellanu y que se musicaron con estilos bien distintos, dende'l pop, la new age, el jazz o el rock, too ello nun discu nel que collabora xente como Igor Tukalo -baxista de Rosana-, el saxofonista Bob Sands y l'armonicista Antonio Serrano, un músicu de primerísimu nivel que toca col Septetu de Paco de Lucía. Ye precisamente esti músicu'l que s'encarga d'interpretar, pa echar el piesllu al discu, una versión del Asturies Patrtia Querida con xeitu de bossa nova. La conocida melodía cola que s'identifica a Asturies nel mundu rebautízase pa esti discu col títulu de "El Indiano". Una amuesa d'audio d'esti tema y de los demás cantares del discu pue sentise na web del grupu.