Un eventu asitia al horru como un 'iconu d'innovación y tradición'

Patrimoniu, cultura, arte, gastronomía, música y mundu rural axúntense en Piloña nesta iniciativa de La Granja Lab y Puru Remangu alredor d'esti bien mueble.

L'encargu del llaboratoriu d’innovación alimentaria qu’apuesta pol mundu rural y la teunoloxía a la conocida marca de ropa d'un diseñu de camiseta pa La Granja Summit tuvo como resultáu "una ilustración que creaba l’horru del futuru, nel que la teunoloxía respete la tradición y seya una ferramienta p'avanzar, vivir, trabayar y crear dende'l mundu rural". Una collaboración que nun quedó ehí, sinón que sirvió de primer pasu pa un trabayu común qu'agora se concreta nel eventu 'L'horru, iconu d'innovación y tradición'.

"Un horru ye l’iconu por escelencia de los nuestros pueblos y del mundu rural. Ye tradición, cultura, identidá y patrimoniu", apunta Puru Remangu sobre esti símbolu que centra l'actividá que va tener llugar na tarde de mañana en Piloña. Ésta va arrancar a les 16 hores en La Benéfica con un amuesa pintura en direuto de nome 'L'horru: una obra d'arte' que va allargase hasta les 20.

Coles places yá completes –escosáronse les 60 en menos de 24 hores–, va entamase a les 16.30 hores una visita guiada cola Asociación del Hórreo Asturiano pelos horros d'Espinaréu baxo'l nome de 'Conoz los tos pegoyos'. Tampoco hai espaciu disponible pa l'amuesa de cocina 'Un bocáu, un tragu, una canción' que Lluis Nel Estrada y Marcos Cienfuegos van presentar a les 18 hores a 40 asistentes, un taller gastronómicu y musical con ingredientes que s’almacenaben nos horros o embaxo d’ellos y música en direuto interpretada por Alfredo González y Silvia Quesada.

Complétase'l programa con una esposición diseñada por Los Patos centrada nos alimentos positivos pa la naturaleza. Los asistentes a esti eventu piloñesu van atopar en La Benéfica un puestu de Puru Remangu nel que se van vender n’esclusiva la coleición de camisetes 'Horru', el camión de comida La Fartukona y yogures X Yowup! pa animales de compañía, mentes que La Maléfica va encargase de poner el chigre y Mediocre DJ la música ente actividá y actividá.