Un estudiu de la Universidá de Lleida afala la educación billingüe n'Asturies

L'académicu de la Llingua y profesor de Pedagoxía na Universidá d'Uviéu Xosé Antón González Riaño y el pedagogu de la Universitat de lleida Ángel Huguet presentaron la otra selmana'l llibru "Actitudes lingüísticas, lengua Familiar y Enseñanza Minoritaria".

Esta obra, que fai el númberu 16 de la colección "Cuadernos para el análisis" qu'espubliza la Universidá de Lleida, fai un estudiu exhaustivu sobre les actitúes llingüístiques del alumnáu d'Enseñanza Secundaria obligatoria nos IES asturianos. Ente les conclusiones principales del estudiu, Riaño y Huguet sorrayen que les actitúes globales hacia l'asturianu y el castellanu son mui positives, pero nel llau negativu l'estudiu espeya como l'usu del asturianu nel contestu educativu va menguando según se llega a niveles educativos más avanzaos. L'estudiu llama l'atención sobre un datu: nun se ven diferiencies d'actitú hacia una llingua o la otra en función a los contestos socio-profesionales; ello quier dicir que l'usu d'una llingua o la otra nun ye yá una cuestión d'estatus social, convirtiéndose asina nuna cuestión tresversal ayena a los intereses d'un grupu determináu, anque los alumnos que reciben clase d'asturianu demuestren una actitú más positiva al billingüismu que los que non. Los autores concluyen que ye preciso implementar proyectos llingüísticos de centru empobinaos dende organismos de planificación creaos pola alministración