Un estudiu amuesa una coincidencia xenética na Península marcada pola espansión de los reinos medievales

Un estudiu anglogallegu sobre l’ADN y les migraciones na Península Ibérica amuesa un patrón xenéticu que concasa en parte col espardimientu de los reinos medievales

Patterns of genetic differentiation and the footprints of historical migrations in the Iberian Peninsula (Patrones de diferenciación xenética y buelgues de les migraciones históriques na Península Ibérica), fechu a comuña pola University of Oxford, la Fundación Pública Galega de Medicina Xenómica y la Universidade de Santiago de Compostela, ye’l nome d’esti estudiu que dexa datos mui interesantes.

El primeru ye la rellación xenética ente los ciudadanos y ciudadanes del norte colos del sur coincidiendo cola espansión de los reinos medievales y los dominios llingüísticos. Frente a una quiciabes esperable rellación d'oriente a occidente, pueden tirase unes llinies de coincidencies qu'amuesen un patrón norte-sur, y que los autores del estudiu identifiquen col movimientu de población que se diera na conquista de territoriu de los reinos cristianos na edá media.

Según les conclusiones, estes diferencies norte-sur faen que dientro d’Andalucía existan grandes diferencies ente un onubense y un granadín. Mentes que, por exemplu la población gallego tien munches semeyances colo de Portugal colo que comparte otru paecíu sorprendente; la presencia d'un porcentaxe más altu qu'otros territorios de rasgos xenéticos comunes cola población norte-africana, una característica que malapenes tien la población d'Andalucía. Estos rasgos norte-africanos son menores al este de la Península.

Nun ye l’únicu datu a destacar, yá qu’otros aspectos del trabayu estudien la contribución xenética de los pobladores que tuvo la Península Ibérica, usando pa ello la comparanza cola composición xenética anguaño d'estaos modernos. Asina revélase qu’Asturies ye’l territoriu peninsular onde se da más coincidencia con Éire y delles partes d’Italia.