Un estoyu de más de 120 años

Tres del pasu a sistemes de pagu de El Mundo y El País, los dos diarios estatales más visitaos na rede, llevábase tiempu especulando colo que pudiere facer el periódicu catalán La Vanguardia, qu'estudiaba tamién facese de pagu. L'alternativa del periódicu catalán, acabante de conocese güei, fai un apueste pol pagu por conteníos, pero en cuenta de pesllar el portal enteru a los non abonaos, namás van ponese de pagu delles secciones, dexando entrar de baldre a les noticies d'última hora y l'estoyu de la selmana, anque pa ello va haber que dase d'alta. Los precios de la soscripción van dende los 3 euros del micropagu pola edición de la selmana a los 50 pola de seyes meses y ochenta por tol añu La Vanguardia dexa pal sistema de pagu la parte más llambiona de la edición dixital, un estoyu en que puen consultase tolos númberos del periódicu dende que s'espublizare per primer vez en 1881. Esti valor informativu añadíu, que nun da nengún otru periódicu nel estáu, va ser ensin dulda un bon ganchu pa los veceros del diariu catalán, pero tamién supunxo un esfuerzu técnicu pa los responsables de la edición dixital. Ello ye que'l periódicu ta enteru en formatu electrónicu del 1999 p'acá, pero los 118 años anteriores hubo que pasalos pel scanner y dixitalizalos en formatu PDF. Como de los periódicos del 1960 p'atrás namás que se guardaben que microfilmes, les dixitalizaciones d'esos primeros 80 años son de menos calidá y el testu vese dacuando un poco borroso. Siendo los PDF documentos pesaos y que nun pue buscase per ellos al través de pallabres clave, los responsables de La Vanguardia anunciaron que yá tan conviertiendo esos periódicos a formatu de testu, colo que más de 120 años de periódicu van poder consultase al momentu na rede.

Contador Estadistiques