Un espaciu de televisión va averar l’idioma a tolos lleoneses

|
Logu ‘El llionés, una llengua viva’

La canal La 8 León, de l’autonómica privada CyLTV, estrena esti llunes ‘El llionés, una llengua viva’, un espaciu televisivu d’once episodios que naz p’averar a tolos lleoneses la llingua llariega. “Una de las cousas que dexa claro ye la unidá llingüística del idioma”, esplica Xairu López, presentador del primer capítulu.

Faceira, El Teixu y la Cátedra d’Estudios Llioneses de la Universidá de Llión son los responsables de los conteníos d’esti programa que s’estrena a les 23 hores de güei. Caún de 20 minutos de llargor, pretende amosar a l’audiencia la historia, les carauterístiques, les variedaes, la toponimia, aspeutos de sociollingüística, la música, la lliteratura o la situación llegal del idioma.

La productora Twimagen ta detrás de la idea de ‘El llionés, una llengua viva’, propuesta a estos coleutivos al traviés de José Ignacio Suárez, de Faceira. De momento namái va emitise en Lleón, anque nun se descarta que nun futuru pueda vese al traviés de toles canales de CyLTV, propietaria de La 8 León, llegando asina tamién a otros llugares de fala asturlleonesa onde emite como Zamora o Salamanca.

“Una de las cousas que dexa claro esti espaciu ye la unidá llingüística del idioma”, esplica López, que güei va encargase d'esplicar “qué ye’l llionés, ónde se fala y las características fundamentales”. N’Asturies va poder siguise en direuto'l programa al traviés de la web de la canal, con redifusiones los martes a les 17.30 hores y los domingos a les 23.30.

En siguientes capítulos monográficos va afondase n’otros aspeutos sobre’l lleonés, “una llengua viva que nun se tien que perder, qu’hemos valorar y que descubriremos a traviés de la intervención de diferentes personas implicadas na súa defensa, estudiu y reivindicación”, espliquen los responsables de ‘El llionés, una llengua viva’.

Contador Estadistiques