Un documental sobre la corrupción nel fútbol chisca a la directiva del Sporting

La canal autonómica valenciana Canal 9 emitió ayeri pela nueche un documental fechu pola productora "El Mundo television" sobre la corrupción y los trafullos del fútbol español. Neto qu'otros programes de periodismu d'investigación d'esta productora, el documental presenta a periodistes que, baxo identidá falsa, consiguen metese en situaciones y conversaciones otramiente llendaos al llabor de la prensa. Nesti casu, los periodistes d'El Mundo TV ficiéronse pasar por empresarios que pretendíen montar un tornéu de fútbol en Sevilla, pa lo que contactaben con Herminio Menéndez, antiguu piragüista con medalla olímpica y qu'anguaño tien una empresa de consultoría deportiva. Yá cola confianza de Menéndez ganada, los falsos empresarios comunicáben-y al ex-deportista que teníen un grupu d'inversores interesaos n'entrar al fútbol español mercando un equipu de segunda. Nel documental, Herminio Menéndez traga la mordida que-y ponen y propón el Granada o el Sporting de Xixón como les dos alternatives meyores, escoyendo a la fin al equipu asturianu pol aquello d'históricu del fútbol español. La parte más fuerte del documental vien cuando los falsos empresarios queden p'aconceyase cola directiva del Sporting y tratar la venta del equipu. Ye entós cuando apaecen Luis García Amado, xerente del equipu, Arango, presidente, y l'empresariu Pepín Fernández, accionista mayoritariu del Sporting. El documental esbilla declaraciones d'ellos tres y del mesmu Herminio Menéndez a lo llargo la xunta graves abondo como pa ser l'escándalu que yá son. L'ex presidente Juan Arango reconoz en documental que pagó pa que'l Sporting B ganare al Pontevedra y la Ximnástica de Torrelavega, mientres que Pepín Fernández llega a dici-yos a los falsos inversores que'l Sporting va salí-yos caru pol valor añadíu que tien la tribuna presidencial, reconociendo darréu que nesi palcu zarró elli contrates por importe de munchos miles de millones. Depués d'estes y otres declaraciones tanto o más graves y que chisquen a más equipos españoles, el documental introduz con sorna una fras na qu'un de los directivos diz que'l mayor problema del negociu del fútbol son los xugadores, que con tolo que ganen son capaces d'armala "por mil duros" El polémicu documental emítelu esta nueche la cadena Localia TV a les 21:30h (canal 40 de la UHF y disponible pa los abonaos a Telecable). Otramiente, la Federación de Fútbol diz que va investigar lo que se declara en documental y buscar posibles responsabilidaes