Un discu con "L.l"

La casa de discos d'Avilés "L'Aguañaz" asoleyó esta selmana'l primer trabayu discográficu del grupu de la Pola L.lena "La Col.lá Propinde".

Esti grupu, que yá dexo bien afitao como atalanta'l folk nos sos directos, llanta agora la so propuesta, estremada de tolo que se conoz, con esti primer discu. El soníu de "La Col.lá" pasa pel folk acústicu, con gaita, guitarres, xiblates...etc; pero "La Col.lá Propinde" bebe de munches fontes que-y aporten la diferiencia de la que falamos. Asina'l grupu avérase a soníos electrónicos, col usu de la gaita midi en dalgunos de los temes, mientres que la batería y les guitarres dan-yos un aire a rock o reggae a delles pieces.

Una característica perimportante nesti grupu ye la voz, y ye que les más de les pieces son cantaes. Pa reforzar esti calter vocal nel discu contaron cola collaboración de voces conocíes, ente les que rescamplen Gema García de "Corquiéu", la cantante de tonada Anabel Santiago y Xosé Ambás, alma de "N'Arba". Tamién collaboraron músicos como Rubén Bada col bouzouki y Diego Posada cola voz y xiblata, mientres que la producción fízola Sergio Rodríguez.

El nome del discu"L.l" ye tou un homenaxe a la "che vaqueira" un soníu que los identifica y del que tan abondo arguyosos. L.l podéis mercalu yá na nuestra tienda, y asina atopar en "La Col.lá Propinde" una forma diferente de ver el folk n'Asturies.