Ún de Grao ufre dos conciertos esti xineru

El primeru va ser esti domingu en Xixón, mentes que'l segundu va celebrase en Rusecu una selmana depués, el día 21.

El proyeutu en solitariu de José Martínez Álvarez, nel que, acompañáu de la so guitarra, esplora na evolución de la tonada asturiana, va poder disfrutase esti domingu nel chigre xixonés La Vida Alegre a les 14 hores. Asturianaes, habaneres y añaes van sentise nesti conciertu de baldre.

Ésti nun va ser l'únicu conciertu d'Ún de Grao nesti xineru, yá que l'intérprete moscón va actuar el domingu siguiente, día 21, na Marquesina del Alba, establecimientu asitiáu en Rusecu. La hora prevista pal comenzu d'esti eventu ye les 13.30 hores.