Un cursu d'escanciáu abre'l VI SISGA

El VI Salón Internacional de les Sidres de Gala (SISGA) va desendolcase hasta'l domingu.

Los llagareros internacionales que participen nel alcuentru visitarán el xixonés Llagar JR, en L’Altu L’Infanzón, a les 18 hores, onde recibirán un cursu d'escanciáu por parte de la delles vegaes campeona d'Asturies Loreto García. D'igual forma van conocer el procesu d'ellaboracion de la sidra natural enantes de desplazase al Barriu la Sidra pa vivir la cultura sidrera del país.

Les actividaes de mañana van comenzar nel Llagar Castañón pela mañana. El xuráu internacional va prebar en Quintueles toles sidres presentaes y fallará cuáles son les meyores de cada categoría: de nueva espresión, esplumoses –brut, dulce, semiseca y rosada–, de pera, de xelu, aguardiente de sidra, llicor de sidra, formatu d'un terciu, la sidra más orixinal y la vencedora del grupu internacional.

Yá pela nueche, va celebrase la Cena de Gala nel xixonés Somió Park, cita na que van armonizase diferentes tipos de sidra con delles propuestes gastronómiques.

Preba abierta al públicu

La Colexata San Bautista, en Cimavilla, va acoyer la preba abierta al públicu del SISGA, "una cita imprescindible pa tolos que deseen conocer la gran variedá de sidres que s'ellaboren n'Europa", afirmen dende la Fundación Asturies XXI, organizadora del SISGA. A la entrada vna tar a la venta copes, a un preciu de 5 euros, coles que se podrán tastiar toles sidres presentaes al salón.

El SISGA va zarrar la so actividá'l domingu cola cuarta xornada de sommeliers, que va celebrase nel xixonés Llagar-Restaurante El Duque, en Castiello.