Un centenar de profesionales en Música en Rede: “Necesitamos un texíu empresarial”, afirma Tejedor

Na xixonesa Llaboral ta celebrándose’l primer alcuentru profesional Música en Rede, con diferentes actividaes. José Manuel Tejedor, que dio un conciertu de 35 minutos na primer xornada, valora con Asturies.com la esperiencia.

La Conseyería de Cultura, Política Llingüística y Deporte organiza la primer amuesa sectorial pa profesionales de la música n'Asturies, Música en Rede, un espaciu pa dar a conocer, impulsar y poner en común el talentu musical nacional. Ana Vanessa Gutiérrez rescampló ayeri na bienvenida institucional "el compromisu y la firme convicción del enorme potencial y talentu del sector de la música n'Asturies”, al tiempu qu'ufrió'l sofitu del so departamentu para entamar aiciones “que permitan el so desendolcu y espansión".

La programación dívidese en diferentes estayes: Erbíes (talleres téunicos), Conxuntes (meses redondes), En Rede (puntu d’asesoramientu), Xuntes (alcuentros comerciales), Rolda (presentación de proyeutos) y Llabor (actuaciones). Nésti últimu participó ayeri José Manuel Tejedor col so proyeutu musical depués de ser escoyíu por un xuráu que fixo una esbilla ente toles propuestes por estilu y formatu.

El gaiteru avilesín presentóse en formatu grande, con un sestetu, y actuó nel Teatru de la Llaboral a les 20 hores nuna xornada na que tamién participó previamente nesi mesmu escenariu Mardom y, nel Paraninfu, Ferla Megía y Galgo. “Son 35 minutos y planteguélo como si tocara pa xente que nunca me viera. Presentamos 35 minutos de música mui variada, de tolos discos, de manera que’l que tuviera presente pudiera ver una muestra de tolo que faigo en direuto”, esplica.

Nel públicu, unes 30 persones, ente les que “había programadores d’Asturies, pero la mayoría de fuera. Lo importante ye eso, que vengan cuantos más de fuera, porque equí n’Asturies yá nos conocemos toos y nun tenemos una necesidá de danos a conocer d’esa manera. Ye interesante pa poder salir fuera”. A la salida nun hebo contautu direutu d’estos profesionales colos diferentes grupos, polo que desconocen les probabilidaes de que lleguen futures llamaes, pero la esperiencia pa Tejedor foi “mui bona. A los que pudi ve-yos la cara, taben mui metíos nel conciertu”.

Tamién Algaire, Mapi Quintana, L-R o Héctor Braga

Llabor, estaya na que va participar güei Algaire y mañana Mapi Quintana, L-R o Héctor Braga, ye una de les munches opciones qu’ufre Música en Rede al centenar de participantes de diferentes campos de la industria. Tamién hai meses redondes, baxo’l nome de Conxustes, como la que punxo esta mañana Adolfo Camilo Díaz, en representación del Conceyu de Corvera, xunto a Juan Gama, del Prestoso Fest, entitulada ‘Mesa de diálogo sobre la programación musical desde los ámbitos públicu y privado’, o la presentención de proyeutos, como Rolda, con presencia d’Ixuxú Cultura, la Orquesta Céltica Asturiana o Dixebra.

“Necesitamos un texíu empresarial onde tanto los programadores d’equí como los de fuera tengan accesu a la música que se fai n’Asturies pa poder danos visibilidá. Si non, ye mui complicao”, considera Tejedor, que celebra l’entamu d’esti alcuentru profesional. “Lo suyo ye qu’haya un texíu importante y, sobre manera, qu’esto diera pa culminar un texíu interior que diera fruto nuna serie de xires que se pudieran dar per sales n’Asturies. Esi texíu pa poder tocar per tol añu”, analiza.

Na semeya, un momentu de l'actuación de José Manuel Tejedor ayeri nel Teatru de la Llaboral.