Un centenar de maestros de Llingua Asturiana y Gallego-asturiano participen en La Felguera na IX Sestaferia Educativa

|
Participantes na IX Sestaferia Educativa

La presentación d’esperiencies y el desendolcu de talleres conformen la IX Sestaferia Educativa, xornada dedicada al profesoráu de Llingua Asturiana y Gallego-asturiana que se centra nesta ocasión na creatividá y anovación nel enseñu de llingües. Más d’un centenar de maestros y maestres participen esti miércoles en La Felguera nesta iniciativa.

Xurde Fernández Fernández, Pilar Fernández González, Óscar García Guerra, Alba Hernández Boada y Alba Sánchez Batalla son los ponentes esti añu d’una actividá que nun se desendolcaba dende’l 2018 por mor de la pandemia. L'aplicación de l’ABP na enseñanza de llingües, les evidencies d’impautu social pa la educación n’asturianu, el diseñu nuevu d’espacios educativos y exemplos práuticos d'actividaes gamificaes y xuegos nel aula son dalgunos de los temes que se traten nesta xornada.

Los oxetivos que se marca la iniciativa qu’entama’l Centru Profesoráu y de Recursos Cuenques Mineres, col asesoramientu de Nuria García Álvarez y Sonia Fernández González (ATD Tresformación Pedagóxica) son “conocer y descubrir estratexes del deprendimientu nes clases de Llingua; conocer l'ABP na enseñanza de llingües; conocer les evidencies d’impautu social pa la educación n’asturianu; conocer exemplos práuticos d'actividaes gamificaes y xuegos nel aula de Llingua; ufiertar un averamientu, al traviés de talleres, a enfoques pedagóxicos diversos; y presentar modelos nuevos d’espacios educativos”. P’algamalos desendolquen ponencies y talleres per 8,5 hores, dende les 9 a les 19.30, en dellos especios de La Felguera como’l Teatru Nuevu, Arkuos, el CPR Cuenques Mineres y la Ciudá Teunolóxica Valnalón.

David Artime, direutor xeneral d’Ordenación, Evaluación y Equidá Educativa, acudió esta mañana a la inauguración de la IX Sestaferia Educativa, “una xornada rellacionada cola innovación educativa, mui acordies al enfoque competencial que promulga la Llei d’Educación nueva, la LOMLOE”, comentó. Xunto a él tuvo presente l’alcaldesa de Llangréu, Carmen Arbesú.

Na semeya, dalgunos de los participantes na IX Sestaferia Educativa.

AdxuntuTamañu
PDF icon Programa IX Sestaferia Educativa194.96 KB
Contador Estadistiques