Un centenar d’emigrantes matriculáronse en ‘Falar y más falar’

El cursu ‘on line’ d’asturianu pa emigrantes entamáu pol Conseyu de Comunidaes Asturianes y la Conseyería de Cultura y Turismo, ‘Falar y más falar’, tien una perbona acoyida. Un centenar de persones de siete países matriculáronse nél.
 
De 60 hores de duración, ‘Falar y más falar’ “tien una orientación práutica y quier animar, al traviés de numberosos exercicios y situaciones, al usu oral y escritu de la llingua asturiana”, afirmen dende’l Gobiernu asturianu. Esti cursu recueye los rudimentos y normes básiques de la escritura correuta del asturianu y fai posible un averamientu práuticu al so usu n'ámbitos cotidianos: el trabayu, el mediu urbanu, los viaxes o les nueves tecnoloxíes. Les persones inscrites van disponer de profesores 'on line' con tutoríes personalizaes y axustaes al so nivel de conocencia al traviés d'Internet y van poder participar en foros específicos nes redes sociales.
 
El centenar de persones matriculaes tienen el so domiciliu n’otres comunidaes del Estáu, Arxentina, Brasil, Chile, Cuba, México, Noruega y Uruguai, y puede desarrollar les clases dende un ordenador en cualisquier parte. ‘Falar y más falar’ ye’l primer cursu ‘on line’ nel que pueden participar los socios de tolos centros asturianos del mundu y ta coordináu dafechu dende Asturies.