El Gobiernu, en collaboración cola Residencia Literaria 1863, asitiada n’A Coruña, entama una beca d'un mes de llargor pa estimular la creación lliteraria n’asturianu y gallego-asturiano a la que pueden optar autores n’activo. “Va ser una estancia mui estimulante, inspiradora y na que se va poder sentir 24 hores al día escritor o escritora desendolcando’l trabayu nunes condiciones d’escelencia”, esplicó la poeta gallega Yolanda Castaño.
El direutor xeneral de Política Llingüística, Antón García, presentó esta mañana na conseyería la ‘Beca Asturies de Lliteratura Asturiana en Residencia’ en compañía de la tamién promotora de la Residencia Literaria 1863. La escritora nacida en Santiago describióla como “un apartamentu marineru del sieglu XIX, de 1863, que foi l’añu nel que se llevantó y nel que Rosalía de Castro espublizó lo sos ‘Cantares gallegos’”, de paredes de piedra y vigues de castañu, nel centru de la ciudá y con vistes a la mar.
El conocíu poeta chilenu Raúl Zurita, Premio Reina Sofía de Poesía Iberoamericana 2020, foi, en febreru del 2019, el primeru n’agospiase nel inmueble, que dende entós, cola esceición única de la época más marcada pola pandemia, acueye tolos meses a un autor o autora de diferentes nacionalidaes, cola novelista xeorxana Tako Poladashvili agora como residente. Filipines, República Dominicana, Bolivia, Países Baxos, Finlandía o Estaos Xuníos son dalgunos otros de los países de procedencia de los creadores, a los que se suma agora Asturies.
“Pa nós ye un arguyu que’l primer territoriu español col qu’afitamos una collaboración estrecha y regular sía’l Principáu d’Asturies”, apuntó Castaño. La inicitiva surde del enfotu del Gobiernu “en facer que los escritores y les escritores d’Asturies tengan la oportunidá de dase a conocer fuera, asina como tamién dientro al traviés de los circuitos que tenemos en marcha”, apuntó García.
Una idea nel que tamién enmarca’l trabayu “col Ministeriu de Cultura pa que la cultura asturiana na Feria del Llibru de Frankfurt del 2022, que ta dedicada precisamente a España”. “A parte d’esi sitiu emblemáticu pa la lliteratura europea queremos tamién entamar esti otru tipu d’actividaes que ponemos en marcha cola Residencia Literaria 1863, que ye dar la oportunidá a un autor o autora, tanto n’asturianu como n’eonaviego, pa que pueda presentar proyeutos a la convocatoria qu’abrimos y pueda tar un mes, n’avientu d’esti añu, nuna estancia lliteraria n’A Coruña”, siguió.
“Aparte de tener una oportunidá d’oru p’apartase de les sos obligaciones y distracciones diaries pa da-y esi impulsu definitivu a la so novela, pa estructurar la so pieza dramática, p’abocetar el so poemariu…, va poder integrase na vida cultural tan rica que tenemos n’A Coruña y Galicia, facer contautos con editores gallegos y españoles, y amosar el so trabayu énte llectores de Galicia. Tamién va tar convidáu a obres de teatru, conciertos, charres, conferencies, etc. Creemos que va ser una estancia mui estimulante, inspiradora y na que se va poder sentir 24 hores al día escritor o escritora desendolcando’l trabayu nunes condiciones d’escelencia”, rescampló Castaño.
Plazos de solicitú
Los aspirantes a disfrutar esta residencia, colos requisitos de tener más de 18 años y polo menos un llibru espublizáu, tienen hasta’l día 31 a les 22 hores pa presentar la solicitú na direición de corréu electrónicu 1863coruna@gmail.com. “Pídese una memoria esplicativa del proyeutu que va desarrollar yá previamente definíu, un currículum, una amuesa de trabayu previu pa que’l Comité de Valoración pueda testar la calidá lliteraria del participante y una carta de motivación”, resumió l'autora en gallegu.
Dicho órganu va decidir la persona merecedora de la beca na primer metá de payares. Ésta va recibir 800 euros, a lo qu’hai que sumar los billetes d’autocar a Galicia o dietes de desplazamientu.
Adxuntu | Tamañu |
---|---|
![]() | 171.14 KB |