Un alcuerdu 'insuficiente dafechu' pa l'ALLA

L'Academia de la Llingua Asturiana (ALLA) espón nun tweet la so disconformidá col alcuerdu ente la FSA-PSOE y Izquierda Xunida no que respeuta al tema llingüísticu.

Tanto na so cuenta Twitter como na de Facebook, la institución académica espresó'l mensaxe siguiente: "L’alcuerdu PSOE-IX ye insuficiente dafechu y nun respuende a les necesidaes y espeutatives sociales. La cooficialidá ye irrenunciable".

D'esta forma l'ALLA dexa nidia la so postura con respeuto a esti alcuerdu ente les dos formaciones pa que Javier Fernández, cola suma de los votos de los cinco diputaos d'IX, algame una mayoría suficiente pa ser presidente del país.

Comunciáu completu

Hores depués de la espublización del 'tweet', l'ALLA fixo públicu'l comunicáu siguiente:

Conocíu’l conteníu del alcuerdu PSOE-IX pa la investidura del próximu Presidente del Principáu d’Asturies, l’Academia de la Llingua Asturiana quier treslladar a la sociedá asturiana lo que vien darréu en rellación col apartáu referíu a la “Institucionalidá, identidá y cultura d’Asturies”:

1) L’ALLA llamenta dafechamente’l conteníu del citáu pautu no que fai a la llingua y a la cultura d’Asturies y cuida que ye otra vuelta una oportunidá perdida pa iguar d’una vez el futuru de la llingua asturiana y garantizar los derechos llingüísticos de tolos asturianos y asturianes.

2) De ninguna de les maneres el curtiu y ruin conteníu del pautu respuende a les necesidaes y espeutatives de la sociedá asturiana.

3) De ninguna de les maneres se xustifica que llueu de más de 30 años de reivindicación llingüística –con una llingua perfechamente normativizada y reconocida internacionalmente, y con una sociedá preparada pa la so normalización social a tolos efeutos–, el compromisu seya la creación d’una comisión d’estudiu sobre’l réxime de proteición del asturianu y la meyora de la Llei d’Usu y Proteición. Y ello, porque

a) cuando lo que se quier ye –como nesti casu– nun solucionar el problema, lo que se fai ye nomar una comisión y solicitar informes. ¿Cuántos van solicitaos y fechos, por exemplu, sobre la reconocencia de la Especialidá Docente del profesoráu de Llingua Asturiana?

Y b) porque la Llei d’Usu y Promoción, que como persabemos nin se respeta nin se cumple en nengún de los sos apartaos, nun almite más meyora que la reforma del Estatutu d’Autonomía p’Asturies y la declaración de cooficialidá de la llingua asturiana.

4) Una vegada más trátase de vaguedaes y de pallabres vaques que nun empobinen a nengún llau y que nun faen otro qu’aplazar y dexar pa más tarde la solución a ún de los problems más serios que carez la democracia d’esti país de magar la transición.

5) L’ALLA da anuncia de que, acordies col discursu institucional del caberu Día de les Lletres, treslladará nel próximu mes de setiembre a toles fuercies polítiques representaes na Xunta Xeneral y al Gobiernu asturianu una propuesta concreta de cooficialidá axustada a les necesidaes y carauterístiques de la sociedá asturiana. La cooficialidá de la llingua asturiana ye pa nós irrenunciable y enxamás dexaremos de trabayar y lluchar por ella.

Uviéu, 15 díes andaos del mes de xunetu de 2015

ACADEMIA DE LA LLINGUA ASTURIANA