Un actu festivu y cultural busca llamar l'atención sobre la situación del texu y la ilesia de La Collá

|
Ilesia Vieya de San Pedru La Collá y el Texu de Ceñal

Manuel Blanco impulsa la iniciativa xunto con otros vecinos d'esti llugar de Siero.

La Ilesia Vieya de San Pedru La Collá y el Texu de Ceñal requieren aiciones pal so caltenimientu futuru. Magar que l'espaciu sía Bien d'Interés Cultural dende l'añu 2017, los habitantes de La Collá alvierten qu'estos elementos tán desatendíos y quieren llanzar un avisu al respeuto.

Pa ello van entamar esti domingu al meudía una xuntanza vecinal informal na que se va falar del futuru del llugar. Va haber sitiu pa la sidra, pa dalgún tema tradicional de gaita interpretáu por Jesús, vecín del llugar, y pa la poesía, cola presencia de Virginia Gil, de la cercana parroquia de Samartino, y Inaciu Galán, venceyáu familiarmente a La Collá.

Tamién va intervenir Blanco, que con esta iniciativa pretende llamar l'atención sobre un sitiu especial y de gran valir artísticu, históricu y natural, afalando a les instituciones a actuar pal so caltenimientu y a los vecinos y vecines a tomar conciencia de la so importancia.

Semeya obra de Galán.

Contador Estadistiques