Un accidente provocáu por un coche en sentíu contrariu fina cola vida d'un home de 40 años

El choque tuvo llugar na A-66, al altor d'El Caleyu, na vía en direición a Uviéu.

Un home de 40 años, Juan José Fernández, residente en Mieres que se dirixía al so puestu de trabayu en Grau, alcontró la fatalidá esta mañana, pasaes les 6.30 hores, nun accidente provocáu por un vehículu que circulaba dende Uviéu en sentíu contrariu. Nel mesmu diben dos mozos de 29 y 28 años, entrambos n'estáu grave, que na plaza de Castilla tomaron la calzada equivocada en direición Lleón. 

Tamién se vieron afeutaos nel choque otru turismu y un camión, provocando dos mancaos leves más, de 45 y 28 años. Hasta'l llugar, el puntu quilométricu 35,800 de l'A-66, nel conceyu de La Ribera, desplazáronse Bomberos del Serviciu d'Emerxencias del Principáu d'Asturies (SEPA) con base nos parques de Mieres y El Campo'l Morgal, xunto al xefe de zona centru, y tamién una dotación de Bomberos del Serviciu d'Estinción y Salvamentu d'Uviéu, que tuvieron qu'escarcelar a ún de los firíos graves y al fináu.

Semeya propiedá del 112 Asturies.