Un 87 por cientu de los llectores d'Asturies.com, partidariu d'estremar lo civil y lo relixoso

La postura del Conceyu d'Uviéu con respeuto a les celebraciones de Selmana Santa provocó les crítiques del arzobispu Jesús Sanz. Un 87 por cientu de los nuesos usuarios apoya esta posición del 'tripartitu' al entender qu'ha d'estremase lo civil y lo relixoso.

L'ayuntamientu uviedín retiró les subvenciones pa la organización d'estos actos, qu'otros años ascendieron a los 21.000 euros, y prohibió la participación con uniforme a bomberos y policía llocal na escolta de los pasos nes procesiones. Un postura que llevó a Sanz a llanzar dardos contra l'equipu de gobiernu na homilía del Domingu Santu na catedral, pero que tien l'apoyu de los nuesos llectores que participaron nel 'Conceyu Abiertu'.

La entruga concreta yera '¿Han de participar activamente les alministraciones en festividaes relixoses como les celebraciones de Selmana Santa?',  a lo qu'un 87 por cientu optó pola respuesta 'Non, hai qu'estremar lo civil de lo relixoso'. Mentes, un 13 por cientu sí que considera que deberíen tomar parte nestos actos "porque son tradiciones populares".

Dende esti mesmu momentu yá ye posible opinar nun 'Conceyu Abiertu' nuevu. Nesta ocasión queremos plantegar a los nuesos usuarios si los ataques que vien protagonizando'l Partido Popular (PP) a la llingua asturiana na Xunta Xeneral y en dellos conceyos del país, con Carreño como casu más reciente, correspuenden a una campaña entamada dende Uviéu o si son aiciones puntuales dientro de la llinia política tradicional d'esta formación nesti asuntu.