Un 76 por cientu de los usuarios d’Asturies.com utilicen de manera habitual software n’asturianu

Los llectores d’Asturies.com tán avezaos al usu de software en llingua asturiana. Un 76 por cientu de les persones que participaron nel nuesu ‘Conceyu Abiertu’ reconoz qu’utilicen de manera habitual programes tornaos al idioma.

La comunidá Softastur, compuesta por una quincena de miembros que trabaya de forma desinteresada, ye la responsable principal de facilitar a los usuarios asturianos la posibilidá d’utilizar programes de software llibre na llingua propia. Asina, cientos d’internautes utilizan nel so día día’l sistema operativu Ubuntu, con base GNU/Linux; el restolador Firefox; o’l xestor de corréu Thunderbird, ente otros munchos. En concreto, un 76 por cientu de los nuesos usarios que partiparon nel ‘Conceyu Abiertu’ afirma facer un usu diariu d’estes ferramientes, por un 24 por cientu que diz nun utilizales.

Los usuarios d’Asturies.com yá pueden votar nun ‘Conceyu Abiertu’ nuevu. Nesta ocasión queremos conocer qué opinión tienen sobre los resultaos del estudiu ‘Valir cultural y educativu de la escolarización de la llingua asturiana’, fechu por Isabel Hevia, del departamentu de Ciencies de la Educación de la Universidá d’Uviéu, por encargu de l’Academia de la Llingua Asturiana.