Un 55 por cientu de los llectores d’Asturies.com nun ve un cambiu de sensibilidá hacia l’idioma en RTPA

Los avances últimos del asturianu na parrilla de la televisión y, sobre manera, de la radio públiques nun vienen por un cambiu de sensibilidá hacia l’idioma na direición de RTPA. Asina lo piensa un 55 por cientu de los nuesos usuarios.

 

L’entamu d’un boletín de noticies diariu de 10 minutos n’asturianu na RPA de llunes a vienres, a lo qu’hai que sumar dende’l llunes próximu un espaciu pal tiempu de la mano de David Arango –anunciada güei por Asturies.com–, el programa sobre ociu ‘Qué facer’, la retresmisión d’ un partíu de Lliga del Uviéu, o la emisión na tele pública de ‘El rostru impenetrable (One-eyed Jacks)’ y una programación especial pola XXXV Selmana de les Lletres, débense más a iniciatives personales qu’a un cambiu de sensibilidá de la direición del ente de comunicación, según opina’l 55 por cientu de los llectores que participaron nel ‘Conceyu Abiertu’. Mentes, un 28 por cientu sí ve otra postura hacia a l’idioma na cúpula de RTPA y un 17 por cientu tien duldes tovía.

 

Dende esti momentu yá ye posible opinar nun ‘Conceyu Abiertu’ nuevu. Nesta ocasión queremos saber quién creen los nuesos usuarios que van ser los trunfadores de les eleiciones al Parllamentu Européu del 25 de mayu y si ven debilidá nel bipartidismu.