Un 46 por cientu de los usuarios d’Asturies.com ven absurdo que FAC se presente por Madrid

Na tarde d’esti miércoles, FAC va inaugurar la so sede en Madrid pa preparar la candidatura del partíu rexonalista al Congresu pola Comunidad. Los llectores d’Asturies.com ven como "una babayada" esta aventura d’Álvarez-Cascos.
 
Un total del 46 por cientu de los nuesos usuarios votó por esta opción nel nuesu ‘Conceyu Abiertu’, mentes qu’un 35 por cientu considera que’l cartel de Francisco Álvarez-Cascos na capital castellana pue permitir a Foro Asturias Ciudadano (FAC), que va presentase na Comunidad de Madrid baxo la denominación de Foro, sumar el númberu de parllamentarios suficientes pa poder formar grupu propiu nel Congresu. Mentes, un 19 por cientu de los llectores d’Asturies.com aseguró nun tar interesáu nos planes de FAC.
 
Nestos momentos, militantes y voluntarios del partíu d’Álvarez-Cascos tán trabayando en Madrid pa recoyer les 5.000 firmes necesaries pa poder presentase a les eleiciones pola Comunidad de Madrid qu’esixe la llei nueva. Ésta ye la primera función de la sede de FAC na cai Hilarión Eslava, númberu 49 baxu –na zona de Moncloa– que va inaugurar el presidente d’Asturies güei a les 17 hores.
 
Otra manera, los llectores d’Asturies.com yá pueden votar una encuesta nueva en ‘Conceyu Abiertu’. Nesta ocasión queremos saber qué sensaciones tresmitió a los nuesos usuarios la intervención na comisión de Cultura y Deporte de la Xunta Xeneral del conseyeru Emilio Marcos Vallaure.

secciones: