Un 44 por cientu de los usuarios d’Asturies.com cifra en 4 los partíos que van tener representación

Los llectores d’Asturies.com consideren que cuatro formaciones van tener representación na llexislatura próxima na Xunta Xeneral. El 44 por cientu de los llectores escoyeron esta opción na entruga que llanzamos en Conceyu Abiertu.
 
Nesta llexislatura tres formaciones tuvieron representación na cámara asturiana: PSOE, PP y la coalición Izquierda Xunida-Bloque por Asturies-Los Verdes d’Asturies, anque’l Bloque pasó al grupu mistu a primeros del 2010 tres romper l’alcuerdu de Gobiernu. Un 44 por cientu de los nuesos llectores consideren que, nesta ocasión, una formación nueva va entrar na Xunta Xeneral, mentes qu’un 5 por cientu considera que va mantenese’l mesmu númberu.
 
La segunda opción más votada foi la que marcaba en cinco los partíos con presencia n’Uviéu, con un 36 por cientu, mentes qu’un 9 por cientu apuesta que la cifra de formaciones con representación van ser seis. Por último, un 6 por cientu de los nuesos usuarios cree que nun se va cumplir nenguna de les posibilidaes espuestes nel Conceyu Abiertu.
 
Hai que señalar que les encuestes publicaes hasta la fecha pola prensa asturiana mantienen a los tres partíos con representación actual y incorporen al Gobiernu a Foro Asturias Ciudadano, partíu llideráu por Francisco Álvarez-Cascos. El Bloque por Asturies, que nesta ocasión va en coalición con Unidá Nacionalista Asturiana, tamién s’apunta un diputáu sondéu fechu por esa formación. Otra manera, los usuarios d’Asturies.com van poder votar una encuesta nueva na seición Conceyu Abiertu a partir de mañana.