Un 42,82 por cientu de los escolinos de Xixón estudia Llingua Asturiana en Primaria

La media de matriculación nos centros de la escuela pública ye del 50,94 por cientu, mentes que na concertada baxa hasta'l 19,09 por cientu.

Nel cursu vixente un 42,82 por cientu de los escolinos y escolines de Xixón ta estudiando Llingua Asturiana en Primaria, por un 57,18 por cientu qu’escueye la materia alternativa, esto ye, Cultura Asturiana. Ye nos centros de financiación mesta onde s’atopa’l númberu más baxu d’alumnos y alumnes dando clase d’asturianu en Primaria, na mayor parte de los casos pol fechu de que les direiciones de les escueles afalen a los padres a escoyer Cultura asturiana, que se da en castellanu y, en dalgunos sitios, s'aprovecha pa introducir actividaes de les escueles que nun tienen güecu n’otres asignatures.

El descensu na matriculación en Secundaria, onde l’asturianu ye optativa y compite con otres llingües como’l francés o l’alemán, ye xabaz, pasando a ser del 7,69 por cientu del total del alumnáu. Na siguiente etapa cai al 2,57 por cientu, nel Bachilleratu diurnu, y al 6,92 por cientu, nel nuecherniegu.