El ‘Conceyu Abiertu’ que plantegamos este dos selmanes últimes sobre’l resultáu eleutoral de Foro de Ciudadanos tuvo unos resultaos mui igualaos. Al final, los nuesos llectores consideraron que'l 20-P foi un ésitu pa la formación asturiana.
Un 39 por cientu de los usuarios d’Asturies.com optaron por esta respuesta “dao’l bipartidismu predominante n’Asturies”. Mentes, un 35 por cientu consideraron que’l resultáu del partíu llideráu por Francisco Álvarez-Cascos nes xenerales foron “lo esperao” pese a que les aspiraciones de Foro yeren algamar cinco diputaos ente Asturies y la Comunidá de Madrid. Por esti motivu, un 25 por cientu de los llectores catalogáronlo de fracasu: al final el partíu que gobierna’l país consiguió un representante, Enrique Álvarez Sostres, nel Congresu, el primeru na historia d’un partíu asturianu.
Aprovechando estes feches nes que munchos asturianos disfruten d’una ponte festiva, queremos entrugar nun ‘Conceyu Abiertu’ nuevu a los nuesos llectores sobre qué opinen sobre les intenciones de la patronal de treslladar estes fiestes cola escusa de la perda de productividá que provoquen. D’esta forma, podría dase’l casu de celebrar un xueves santu en llunes o qu’un 1 de mayu que caiga en miércoles pase al llunes o al vienres.