Uiquipedia yá tien 14.000 artículos

Uiquipedia, la enciclopedia llibre en llingua asturiana, cumplió esta selmana los 14.000 artículos publicaos. De les ediciones en 278 llingües estremaes, Uiquipedia asítiase nel puestu 88 en cuantes a bayura de conteníos.

El proyectu Uiquipedia nació nel añu 2004 al rodiu del proyectu internacional de Wikipedia. Dende esa fecha, nun aparó de medrar y en seis años yá algamó 14.000 artículos publicaos.

Pesie a los avances, la enciclopedia llibre n’asturianu nun algama la cantidá d’artículos que tienen les versiones n’otres llingües cercanes como’l gallegu o l’aragonés.