Echa a andar la UABRA en Cangas

|
Echa a andar la UABRA en Cangas

Güei entama en Cangas del Narcea la quinta edición de la Universidá Asturiana de Branu (UABRA),  proyectu formativu desendolcáu gracies  a la collaboración ente l’Academia de la Llingua, Universidá d’Uviéu y el Conceyu de Cangas del Narcea.

Nel actu d’inauguración intervendrán el Vicerrector d’Estensión Universitaria y Comunicación de la Universidá d’Uviéu, Vicente Domínguez García; l’Alcalde del Conceyu de Cangas del Narcea, José Luis Fontaniella Fernández y el Direutor de los Cursos, Xosé Antón González Riaño.

Los Cursos y xeres complementaries desendolcaránse ente los díes 28 de xunetu y 8 d’agostu y nellos van participar más d’un centenar de persones.

 “Cursu Elemental de Llingua Asturiana”, “Cursu Avanzáu de Llingua Asturiana”, “Curso de Gallego-asturiano (segunda fase)”, ‘Cursos d’Afondamientu Cultural y Llingüísticu” son los cursos colos que cuenta'l programa d’esti añu de la UABRA. El “Cursu d’Afondamientu Cultural y Llingüísticu” tendrá les estayes de ‘Capacitación pa la Traducción al Asturianu’, impartíu pola académica Cristina Valdés Rodríguez, ‘Internet como recursu educativu’, coordináu por David Melendi y ‘Cantares, bailles ya instrumentos musicales asturianos’, a cargu de José Antonio Gómez.

Estos cursos, gracies a la collaboración de la Universidá d’Uviéu, tienen pa los  estudiantes de carreres universitaries, ente 4,5 y 6 creitos de llibre configuración por participar nellos.

130 participantes

Esti añu van acudir a Cangas un total de 130 persones, de los que 100 son alumnos y 30 profesores y conferenciantes. El direutor de la UABRA, Xosé Antón González Riaño, destaca que "mantenemos el númberu d'alumnos pese a presentar una ufierta educativa menor por motivos estrictamente presupuestarios".

Güei, dientro de les Actividaes Abiertes d’esta edición de la UABRA, tendrá llugar la inauguración de la esposición 'Sable. Una revolada pelos arenales d’Asturies' na sala d’esposiciones de la Casa de Cultura de la villa canguesa. Mañana principien el ciclu de conferencies, que van tener llugar a les 19 hores nel salón d'actos de la Escuela Hogar: 'Trestornos del llinguax na xente mayor y l'Alzheimer', a cargu de Fernando Cueto; 'Les aportaciones caberes de la llingua asturiana nes nueves teunoloxíes (TIC)', a cargu de Xandru Armesto (xueves); 'La esperiencia del emplegu de la llingua asturiana nos informativos de la RPA', a cargu de Naciu Varillas (martes 5); y 'Polítiques sociales de dignificación del asturianu. Iniciatives a curtiu y mediu plazu', a cargu d'Ana Fueyo (xueves 7).

link: http://academiadelallingua.com/comun.php?seccion=cursos

Semeya de la presentación (Fonte ALLA)

Contador Estadistiques