Una UABRA “perfeutamente afitada” tratará de recuperar el númberu máximu de cursos d’afondamientu na edición próxima

La quinta edición de la Universidá Asturiana de Branu (UABRA) llegó al so fin tres dos selmanes d’actividá en Cangas del Narcea. El so direutor Xosé Antón González Riaño trabaya yá na cita próxima, onde espera algamar los seis cursos d’afondamientu.

“Profesores y propuestes tenemos de sobra”, afirma l’académicu, que califica de “mui positiva” la UABRA d’esti añu. “Nesta ocasión tuvimos menos cursos por motivos estrictamente presupuestarios, anque’l mesmu númberu d’alumnos, y yá tuvi falando cola presidenta de l’Academia pa recuperar el númberu máximu de cursos d’afondamientu de cara a la edición próxima”, que por capacidá d’agospiu sitúa en seis –trés na primer selmana y otros tantos na segunda–, anque por posibilidaes docentes podría llegar hasta los ocho. Lo que sí tien bien nidio González Riaño ye que, tres cinco ediciones, “la UABRA ta perfeutamente afitada”, como amuesen los númberos d’esti añu: 130 participantes, de los que 100 son alumnos y 30 profesores y conferenciantes.

Dende’l 28 de xunetu hasta’l vienres pasáu desendolcáronse en Cangas del Narcea los yá tradicionales ‘Cursu Elemental de Llingua Asturiana’, ‘Cursu Avanzáu de Llingua Asturiana’ y ‘Curso de Gallego-asturiano (segunda fase)’, a los qu’hubo que sumar trés de ‘Afondamientu Cultural y Llingüísticu’:  ‘Capacitación pa la Traducción al Asturianu’, impartíu pola académica Cristina Valdés Rodríguez; ‘Internet como recursu educativu’, coordináu por David Melendi; y ‘Cantares, bailles ya instrumentos musicales asturianos’, a cargu de José Antonio Gómez. Ésti últimu foi especialmente dinámicu, “yá que los alumnos tuvieron una gran participación y llograron movilizar a tolos participantes de la UABRA”, a lo que tamién ayudaron el propiu maestru y los artistes convidaos, como Xosé Antón Fernández ‘Ambás’, Héctor Braga o Llorián García.

Conferencies destacaes

Pero si de dalgo ta especialmente satisfechu González Riaño ye del resultáu de les conferencies celebraes mientres la UABRA, de les qu’opina qu’habrá “de camudar el nome por conferencies-coloquiu pola amplia participación de la xente”. D’elles destacó la de Fernando Cueto, de nome 'Trestornos del llinguax na xente mayor y l'Alzheimer’, pola “reputación internacional” del especialista, “la bona estructura de la charra, la participación y el bon usu del asturianu”. Tampoco nun se quedaron atrás les otres trés restantes, qu’afondaron nel usu de la llingua asturiana como elementu comunicativu, yá sía nes nueves teunoloxíes o nos medios de comunicación. Asina, Xandru Armestu faló de 'Les aportaciones caberes de la llingua asturiana nes nueves teunoloxíes (TIC)', el periodista Naciu Varillas de 'La esperiencia del emplegu de la llingua asturiana nos informativos de la RPA’ y la direutora xeneral de Política Llingüística, Ana María Fueyo, de ‘Polítiques sociales de dignificación del asturianu. Iniciatives a curtiu y mediu plazu’, afondando nes aiciones que’l so departamentu ta faciendo pa una presencia mayor del idioma nos medios de comunicación públicos.

“Estes trés conferencies, xunto cola proyeición y alderique col direutor de ‘Bernabé’, el primer llargumetraxe n’asturianu, dexen ver les posibilidaes del asturianu como ferramienta comunicativa”, afirma González Riaño, que tamién emponderó’l llabor de dellos periodistes de RTPA que, tres presentar propuestes a la direición del ente, preparen novedaes n’asturianu na estaya d’informativos de la TPA pa feches próximes.