Txurruka gana la Vuelta a Asturies tres caltener el lideratu nel Naranco

|

El veteranu ciclista vascu Amets Txurruka (Caja Rural-Seguros RGA) consiguió’l so primer ésitu como profesional al algamar la etapa inicial y la xeneral de la LVII Vuelta a Asturies. Javi Moreno (Movistar) ganó la XLVII Xuba al Naranco.

El vencedor de la Vuelta a Asturies nel añu 2011 fixo lo posible por arrampuñar el lideratu al d’Etxebarria na cima uviedina, pero’l bon facer del so equipu permitió-y apuntar el mayor ésitu de la so carrera sobre la bicicleta. Al final, Moreno tuvo que conformase cola victoria nel Naranco nun sprint nel que superó a Mikel Landa (Euskaltel-Euskadi) y Andre Cardoso (Caja Rural-Seguros RGA).

Txurruka tuvo acompañáu nel podiu final por Landa, al que sacó 3 segundos de ventaya na xeneral, y por Moreno (4 segundos). No que respeuta a los asturianos en carrera, Higinio Fernández Suárez y Israel Nuño, finalizaron decimonovenu (8 minutos y 2 segundos) y trixésimosegundu (13 minutos y 28 segundos), de manera respeutiva. Mientres, Rubén Menéndez, nun terminó la competición.

Hai que destacar qu’esta edición de la Vuelta a Asturies-Julio Álvarez ‘Mendo’ foi entá más corta que la del añu pasáu, pasando de trés a dos etapes: la primera, ente Uviéu y La Pola Ḷḷena, y la segunda, ente Güeñu y l’Altu’l Naranco. Les dificultaes económiques tuvieron a piques de llevar a la organización a facer un parón d’un añu; sicasí, el Club Ciclista Aramo confirmó al finalizar la prueba que la ronda asturiana contará con cuatro etapes l’añu qu’entra.

 

Contador Estadistiques