Turquía bombardia dellos oxetivos en territoriu siriu en respuesta a la muerte de cinco civiles

|

La tensión medra na frontera ente Turquía y Siria. El país otomanu bombardió esti miércoles dellos oxetivos en territoriu siriu en respuesta a la muerte de cinco civiles nuna población fronteriza por trés disparos de morteros.

Les disputes ente l’exércitu siriu y los rebeldes provocaron que'esta mañana'l fueu alcanzara un pueblu situáu cerca de la llende ente dambos países, causando la muerte de cinco civiles y trece feríos, dos d’ellos graves. Nun ye la primer vegada que les lluches en territoriu siriu afeuten la vida en Turquía, anque non con consecuencies tán graves. La reaición del primer ministru turcu, Recep Tayyip Erdogan, foi la d’ordenar l’ataque de dellos oxetivos en Siria llocalizaos con radar. Mentes, Damascu anunció l’apertura d’una investigación pa conocer les causes del socesu.

Tres l’ataque, Turquía alcontró l’apoyu de la OTAN. Los embaxadores de los 28 estaos que componen la Organización del Tratáu Atlánticu Norte (OTAN), aconceyaos d’urxencia en Bruxeles a pidimientu d’Ankara, condenaron l’aición siria y encamentaron a Damascu a que ponga fin al usu de fueu en territoriu turcu. "Como declaramos el 26 de xunu del 2012, l’Allianza continúa vixilando la situación en Siria", señalaron los aliaos.

 

Contador Estadistiques