Turón entama un festival de Hip Hop

La plataforma xuvenil de Turón, "El Séptimo Crio" y la Sociedá Turonesa de Festexos entamen una riestra d'actividaes que van xirar al rodiu del hip hop, con espresiones musicales, artístiques y charres.

Esti festival ta bautizáu col nome de Tercera revolución Hip Hop, va enllenar Turón lo díes 9 y 10 de setiembre de tolo que tien que cola cultura, que ta viviendo un espoxigue d'un tiempu p'acá. El programa incluye Rap, DJs, charlas, proyecciones y graffitis. Asina, les actividaes van desarrollase'l vienres 9 y sábadu 10. Los graffitis va entamar a les 12 de la mañana, col oxetivu de tresformar los muros del parque y del Polideportivu de Turón. Yá perla tarde, a partir de les 17:00 hores, vamos poder asistir a les charres, proyecciones y conciertos. Tola actividá va concentrase n'El Parque de Turón y la Casa de la Mocedá.

Otra manera, como preba de la vitalidá d'esi movimientu hiphoperu n'Asturies, sal a la cai un discu nuevu de los l.lenenses LOR. Tres el so discu anterior Street Opera, el grupu vuelve con "Fuego", onde siguen pel camín d'un soníu hardcore qu'amestase ales voces del rap de LOR. El discu espublizalu la factoría Jazzy FM Studios, propiedá del tamién raperu asturianu Mario Fueyo, más conocíu por Dark la Eme.