Tuenda y Merlín calecen la seronda

Esti xueves quince d'avientu hai programaes dos actuaciones musicales que van ser en locales cerraos p'abellugase del mal tiempu. Los encargaos de da-y calor a la nueche de mañana van ser Tuenda, que presenten el so discu en Grau, y Merlín, qu'actua nel café Trisquel de Xixón.

Tuenda aprovecha'l conciertu de mañana xueves pa presentar el so primer discu que lleva'l mesmu nome que'l grupu. Espublizáu por Tierra Discos, el cd atropa 17 cantares de la música tradicional asturiana, toos ellos cantaos cola voz de Xosé Ambás acompañada polos instrumentos d'Elías García col bouzouqui y Pepín de Muñalén cola xiblata travesera. La entrada pal conciertu ye de baldre, y va ser a les 20:00 hores na Casa la Cultura de Grau.

En Xixón tamién vamos tener música en directo, gracies nesta ocasión a la programación musical que fai'l Café Trisquel de Xixón. Ellí los que van tocar son Merlín, veteranos del folk asturianu y qu'axunta a los músicos de Lliberdón pa facer un repertoriu folixeru que de xuru va quitar el fríu a tolos presentes. Neto qu'en Grau, la entrada pal conciertu ye de baldre, y va entamar a les 21:30 hores nel local xixonés que ta na cai Marqués de San Esteban.