Tuenda presentó oficialmente’l so discu

Na mañana d'ayeri fízose la presentación oficial del discu de Tuenda. Los miembros del grupu, Elías García, Pepín de Muñalén y Xosé "Ambás" asina como'l responsable de la casa de discos "Tierra" Ígor Medio, contaron a la prensa les sos impresiones na grabación y que ye lo que quieren amosar con esti trabayu discográficu.

Estos díes va tar nes tiendes el cd de Tuenda ,editáu por Tierra responsable de discos d'otros grupos como la Bandina'l Tombo o Corquiéu. Na presentación que se fizo ayeri nel local de Sociedá Xeneral d'Autores tanto'l grupu como la casa de discos espresaron la so satisfacción pol resultáu final algamáu. "Tamos mui contentos del resultáu final, y amás queremos agradecer muncho la collaboración de xente como Xuan Bello que nos fizo un pequeñu testu pal cartafueyu del discu, a Fernando Álvarez Balbuena pola revisión llingüística adaptando cada tema a la variante del asturianu d'onde foi recoyíu, y no musical, L.lucianu Menéndez pol cantu bifónicu y Sergio Rodríguez pol so baxu en dellos cantares".

Xosé "Ambás" ún de los miembros del grupu, comentó na presentación l'orixe de los 17cantares del discu, "son toos temes inéditos que, quitando ún, pertenecen toos al mi archivu personal que vengo recoyendo de quince años p'acá". Nesti sen Ambás diz que'l de Tuenda ye un casu curiosu ya que, "normalmente los grupos folk faen reellaboraciones sobre pieces interpretaes pol grupu de música tradicional, mientres que nós trabayamos directamente sobre'l material de campu". Asina aseguró que "Tuenda ye una formación onde nun nos alloñamos de la tradición". Como exemplu d'esta filosofía de trabayu' cantante punxo la semeya de la portada del discu, onde apaecen los trés componentes del discu, Elías García col bouzouki, Pepín de Muñalén cola xiblata y Xosé Ambás cola voz, tocando y cantando cola informante "Pepa las Murias" los Aguilandos de las Murias ya Pandu, ún de los cantares qu'apaecen nel discu. Como ellos mesmos comentaron "lo único que-y estrañó un poco a esta muyer de más d'ochenta años foi'l bouzouki, pero enseguidina nun tuvo nengún problema pa cantar con nós".

Los componentes del grupu tamién falaron de lo novedoso de la so formación, ya que ver solo trés miembros nún grupu de folk nun ye vezu. Elías García comentó que "tamos mui a gustu con esta formación porque nos permite improvisar yá que nun partimos d'una estructura de los cantares tan ríxida como en formaciones más grandes". Ígor Medio, responsable de Tierra discos, apuntó que "esti tipu de formaciones refresca'l panorama de la música folk d'Asturies, que nestos momentos vive un momentu mui dulce, mui dinámicu onde nun hai estancamientu como diz della xente".

Asturies.com yá presentamos esti trabayu discográficu hai unos díes, y onde ufiertábemos la posibilidá los nuestros llectores de descargar un cantar d'esti discu, posibilidá que tornamos a ufiertar güei namás que calcando equí.