Tuenda espubliza'l so primer discu

El tríu musical Tuenda danos la so versión de la música vocal asturiana nel so primer discu. Cola voz de Xosé Ambás a la cabeza, con Tuenda podemos facer un recorríu descubriendo la variedá musical y llingüística qu'amuesa la cultura asturiana. Asturies.com ufierta a los sos llectores la posibilidá d'entamar esti camín descargando ún de los cantares d'esti discu de Tuenda.

Tuenda ñaz de la xuntanza de trés músicos pa un conciertu no que se vieno a llamar el ciclu de Folk de Cámara, que se fai en Xixón casi tolos años d'onde tamién salieron otros grupos como DRD. A los trés músicos que tocaron n'aquel conciertu -Xosé Ambás na voz, Elías García bouzouki y Pepín de Muñalén na xiblata travesera- gustó-yos la esperiencia, y vieron que la formula de xuntar cantares tradicionales asturianos cola xiblata y el bouzouki nun formatu acústicu funcionaba bien. Asina punxéronse a trabayar pa desenvolver el so conceptu musical hasta llegar a esti discu, onde la personal voz del tamién gaiteru y cantante de N'Arba Xosé Ambás, empastia perbien col soníu de la xiblata y el bouzouki. Esta rellación bona ente los soníos ye frutu ensin dubia de la bona producción, y d'apostar pol modelu qu'acústicu qu'a esta formación-y vien al pelo. Amás del soníu de los instrumentos rescampla tamién lo interesante de los cantares, yá que son los más d'ellos son material recoyíu pol propiu cantante del grupu nel so trabayu etnográficu de recuperación de la música tradicional asturiana. Ye dicir , les voces de persones que guarden la esencia de la música tradicional lleguen hasta nos al traviés de la interpretación de Tuenda.

El discu espublizalu la casa de discos Tierra, nun subsellu que s'estrena con esti discu llamáu Folk de Cámara, que quier dedicase a esti tipu de formaciones pequeñes y acústiques. La producción foi cosa del propiu grupu y grabóse nos estudios Tutu de Corvera col técnicu de soníu de Sergio Rodríguez.

Pa sentir daqué de lo que podemos descubrir nesti discu que lleva'l nome del grupu, Asturies.com, cola collaboración de Tierra Discos, ufierta la posibilidá a los nuesos llectores de descargar el primer corte del cd -Non, non, Maruxa- cantar del conceyu d'Ayer que puede descargase namás que calcando equí.