Tuenda actúa’l vienres en Villayón dientro del ciclu de conciertos ‘Conceyo de cantares’

Coincidiendo cola Festa de Los Dolores de Villayón, Tuenda va llevar el vienres la so música a esti conceyu del occidente del país. L’actuación ta enmarcada dientro del ciclu de conciertos ‘Conceyo de cantares’.
 
Los conceyos del Parque Histórico del Navia, en collaboración cola Oficina de Coordinación Cultural ya Llingüística de la Fundación Parque Histórico del Navia, entamen esti ciclu d’actuaciones de los grupos que formaron parte del CD editáu pola oficina nel añu 2010 y que lleva’l nome de ‘Conceyo de cantares’. Nesta ocasión ye’l turnu de Tuenda, banda que ta acabante d’asoleyar el so tercer discu, que lleva’l nome de ‘Tuenda 3’. El tríu compuestu por Xosé Ambás, Pepín de Muñalén y Elías García va actuar en La Plaza de Villayón a partir de les 22.30 hores.
 
Los conciertos de setiembre y ochobre del ciclu ‘Conceyo de cantares’ que van siguir al de Tuenda en Villayón son el de Cádaba n’A Caridá (día 24) y el de Mezá en Pezós (15 d’ochobre). Mentes, los d’Ambás van repetir actuación el 29 d’ochobre, nesti casu na Feria del Mel de Bual.