Trunfu del centru-derecha nes elecciones estonies

El Partíu Reformador del primer ministru Andrus Ansip llogró'l 27% de los votos nes eleccions llexislatives d'Estonia, que tuvieron llugar esti domingu. La formación de centru-derecha convertióse asina na más votada y llogra 30 de los 101 escaños del parlamentu, mientres que'l Partíu de Centru quedó en segundu llugar col 21,5% de los votos y 29 escaños. Los dos partíos mayoritarios podríen repetir con estos resultaos alcuerdu de gobiernu xunto colos socialdemócrates, que tienen 10 escaños, cola Unión del Pueblu, partíu agrariu que llogró'l 7,1% por cientu de los votos y seis escaños o colos Verdes, qu'entraron por primer vegada en parlamentu. L'alianza opositora de derecha de los partíos Pro Patria y Res Pública llogró'l 17,8 por cientu, algamando 19 escaños.

Una novedá nes elecciones estonies foi l'inxerimientu nel procesu de votación del sufraxu electrónicu al traviés d'internet. Cerca de 30.000 votantes d'esti país de 1.400.000 habitantes escoyeron esta opción, que precisaba pa executase del usu del DNI dotáu d'un chip electrónicu y un sistema de claves d'alta seguridá. Ello ye qu'internet y les nueves tecnoloxíes son ún de los principales pegoyos de la economía d'esta ex - república soviética que llama l'atención por ser ún de los países de la so contornada con menos índices de corrupción. Anque ta a muncha distancia de los indicadores económicos de los países más desarrollaos de la UE, Estonia rexistra un crecimientu económicu mui altu que rescampla colos de les demás repúbliques de la URSS, anque l'aplicacaión de polítiques neolliberales lleva a que'l país rexistre graves problemes de falta de cobertura social y inflación esaxerada.