Trunfu d'asturies en balonmano

La Selección Asturiana de balonmano volvió a xugar ayeri diez años dempués del últimu partíu qu'echare. Estrada de xugadores de la Lliga Asobal, la Selección nun tuvo problema dengún pa ganar, con resultáu final de 28-22, a un equipu brasileñu que nun funcionó nel primer tiempu pero qu'esconsonó tres el descansu.
Yá de mano, los asturianos, cola defensa adelantada y Entrerríos xugando mui bien, entamaron metiéndo-y un 5-1 a los brasileños, que semeyaben tar n'ayén sobre la pista del pabellón. La cosa foi tan escandalosa que la selección asturiana, beneficiada polos contínuos erros del rival, plantificose nun momentín con 11-4, forzando al entrenador brasileñu a pidir tiempu muertu. La recuperación americana vieno más pola folgancia que-yos entró a los asturianos que por méritu propiu, pero'l primer tiempu acabó con 15-7.
Pal segundu tiempu, los brasileños salieron más convencíos. Con un porteru distintu al del primer tiempu (Luiz Ricardo en cuenta de Marcos dos Santos) tragaron menos goles y xugaron con más alegría. Los brasileños espoxigaron, y cuando llegaron al 19-17, sonó l'alarma. Entós pablo Fernández volvió a marcar p'Asturies, cambiando dafechu la situación. Asturies volvió a garrar algo de ventaya y, cola cosa bastante decidía, llegó l'espectáculu, al que s'apuntaron los brasileños cuando'l meta Luiz Ricardo metió un gol aprovechando un despiste del porteru asturianu. A la fin 28-22 y un partíu entreteníu.