Tribeca va programar conciertos de bandes de renome de la mano de la productora Santo Grial

Uviéu va contar con una programación de conciertos de bandes de renome gracies a la iniciativa de la Sala Tribeca y de Santo Grial. Mala Reputación y Misiva van abrir una serie d’actuaciones na sala, que cuenta con un escenariu y un equipu renováu.
 
Con un aforu de 400 persones, Tribeca pretende convertise nuna sala de referencia pa traer bandes qu’enantes nun acudíen a la ciudá por falta d’espaciu nes instalaciones yá esistentes. Santo Grial, empresa que tamién entama’l Derrame Rock, va ser la productora encargada de la programación de la sala uviedina que va convertise, xunto a l’Acapulco de Xixón y, en menor midida, l’Albéniz, nun de les poques que celebren conciertos de manera habitual pa un públicu ampliu.  
 
De momento, Santo Grial anunció la programación prevista pa mayu y xunu. En branu habrá un parón y pa la seronda tornarán los conciertos de bandes de renome na sala uviedina. Los asturianos Mala Reputación y Misiva van inaugurar esti ciclu nuevu de Tribeca’l 5 de mayu nun conciertu que va tener un preciu de 8 euros, anticipada; y de 10, na puerta. Completen la programación pa estos dos meses Reincidentes (6 de mayu); Koma (13 de mayu); El Último ke Zierre (20 de mayu); Angelus Apatrida, Sound of Silence y OST (27 de mayu); Arma X, Alto Asalto y Galán (3 de xunu); y Obus (10 de xunu). Les entraes pa estos conciertos yá tán a la venta en Musikaze.com, Ticketmaster, Santo Grial Producciones (Uviéu), Llibrería Paradiso (Xixón) y Discos Eusebio (Mieres).