Trés puntos mui caros

L'Uviéu ganó pela mínima al Zalla pero Darío vovió a mancase y va perder lo que queda de temporada.

Nun paga la pena un trunfu cuando se pierde pa tola temporada a ún de los xugadores de la plantiya. Tres siete meses de baxa, Darío entró nel campu pa llevase la mayor ovación del partíu nel min.61. El valencianu punxo la llucha de siempre y gracies a esto atopó una ocasión de gol nuna imprecisión vasca en defensa, encarando al porteru, pero nel intentu de regate volvió a mancase. Yera'l minutu 76, solo un cuartu d'hora pa francir una de les grandes esperances de l'afición pal futuru del equipu azul. Namás queda esperar qu tire p'alantre y vuelva a recuperase pa la temporada que vien col sofitu de los sos compañeros y de tola afición azul.


Otramiente, la victoria foi importante porque avera al equipu a les posiciones altes de la tabla onde los cuatro primeros tán mui fuertes y entamen a marcar diferencies. El partíu tuvo dos partes mui distintes. Nos primeros 45 minutos l'Uviéu foi un equipu sólidu que xugó bien el pelotu y tuvo'l mandu, na segunda metada los azules echáronse p'atrás y cerca tuvieron d'armala y perder dalgún puntu d'un partíu que taba mui bien encarriláu.


Sacó Rivas de mano un 4-4-2 con Fradejas y Borja como novedaes nos llaterales, l'equipu furruló y tuvo'l control del xuegu con muncha presión, más seguridá en defensa, más solidez nel mediu'l prau y Michu y Jandro creando peligru con bones entraes pela banda. Asina llego'l gol del Uviéu nel minutu 20, Ismael recuperó un balón y tocó pa J. Carrera que-y dio un gran pase a Jandro, qu'entró con muncha fuercia dende la banda recatiando al porteru y marcando de tiru rasu. Pudo rematar el partíu l'Uviéu nesta primer parte, pero Juanes evitólo con dos grandes paraes a N. García y N. Rodríguez.

L'Uviéu foi otru nos segundos 45 minutos, perdió'l sitiu dafechu y el Zalla pasó a dominar el partíu anque amosó una clara falta d'efectividá. L'Uviéu aguantó los 45 minutos metíu atrás y sacando unes poques contres que'l porteru vascu foi a evitar con tres grandes paraes. Los cambios de Rivas nun camudaron el ritmu del partíu pero'l Zalla tampoco foi a batir la puerta de R. Ponzo, destacar un sustu final pa l'afición col árbitru pitando y señalando l'área pa saca-y una tarxeta a un xugador vascu por tirase. En definitiva, tres puntos importantes p'averase a la parte de la clasificación pero que queden empañaos pola grave lesión de Darío Aliaga que va tener qu'esperar pa volver al Tartiere pero de xuru tendrá a tol equipu y l'afición p'ayudalu.