Trés puntos intrescendentes

El Sporting precisó d'esperar 70 minutos pa marcá-y a un Ciudá de Murcia que ta en plaza de descensu a segunda B, el mesmu camín que podría llevar l'equipu asturianu en casu de nun iguar los sos problemes económicos.

Sporting y Ciudá de Murcia xugaron ayeri un partíu aburríu por demás nel que los de casa, colingándose nos puestos de descensu, teníen muncho más que perder que l'equipu asturianu, que pasa esti tramu final de la liga en tierra de naide esperando que llegue'l final d'un añu ensin más historia que la de los fastos del centenariu.

El Sporting foi ramplón y conformista, dexando facer al equipu murcianu, sobremanera al principiu del partíu, pero, por suerte pal Sporting, el goleador murcianu Güiza nun tenía'l día. El Ciudá de Murcia llegó a apertar entovía más fuerte tres del descansu, forzando un penalti qu'atayó Roberto, mui inspiráu na tarde d'ayeri.

El Sporting buscóla a la contra, y dio con ella,anque tuvo d'esperar hasta'l minutu 76, en qu'Ismael, máximu goleador del equipu nesta campaña, metió pa contra la rede un corner. Diez minutos dempués, nel 86, el mesmu Ismael convertió na ventaya definitiva un bon centru que-y apurriera Pablo Álvarez. Col resultáu yá afitáu, Marcelino dió-y unos minutinos de Isma, que sigue recuperándose de la mancadura que lu tuvo tola temporada ensin xugar.