Trés díes n'Uviéu cola Ascensión

Yá ta completu'l programa d'actividaes de la Feria de l'Ascensión d'Uviéu, onde amás del tradicional mercáu de ganáu, esposiciones, mercáu astur y desfiles con bandes de gaites, rescamplen los conciertos de folk.

El Conceyu d'Uviéu fexo un apueste por esta Feria, na qu'invirtió 287.525 euros de presupuestu, que van gastáse n'actividaes en dellos espacios de la capital del Principáu, de forma que los próximos díes del 21 al 23 de mayu van mecese esposiciones, conciertos y otres actividaes en puntos tan separtaos como la Plaza de la Catedral, la Llábana de la Estación de la Renfe, la Plaza Porlier, y como non, el vecín conceyu de Llanera col so Mercáu de ganáu. Ún de los aspectos de la cultura asturiana protagonista nesta ediciónde l'Ascensión va ser la cultura vaqueira, cola I Muestra sobre la treshumancia vaqueira y una boda vaqueira'l sábadu 22 como exemplos que van servir "pa que too Uviéu vea lo más puro d'esta cultura" como dixo ayeri na presentación del programa de la Feria José María Peláez, "Peltó", portavoz de l'Asociación de Vaqueiros d'Alzada.

Les esposiciones que vamos poder vistar a lo llargo d'estos trés díes son la I Esposición de la indumentaria tradicional asturiana. entamada pola asociación Vezos Astures na Llábana de la Estación de la Renfe, la I Muestra Vaqueira y la III Feria de Luthiers nel mesmu llugar, la I Esposición de la cultura popular del Oriente d'Asturies y la I Esposición de la cultura popular asturiana. Amás, ente la Plaza de la Catedral y la de Porlier va tar el Mercáu Astur, colos puestos y l'animación a los que yá tamos fechos nestos mercaos.

Ún de los platos fuertes de la edición d'anguaño de l'Ascensión va ser el I Festival Folk de l'Ascensión. Les tarde-nueche de los tres díes van tener conciertos de grupos folk asturianos na Llábana de la estación de la Renfe. Tolos conciertos van entamar a eso de les 20:30 hores p'acabar a les 23:30, y van ser dos grupos los que toquen en cada conciertu, entamando'l vienres día 21 con "Gatos del Fornu" Y "Llan de Cubel", sigiendo'l sábadu 22 con"Corquiéu" y "Tejedor" y pa pesllar l'Ascensión del 2004, el domingu 23 va ser el turnu pa "Llangres" y el gaiteru Xuacu Amieva.

Amás de toes estes actividaes de les que damos anuncia, nel programa hai munches más. Pa conocer el restu de propuestes d'esta Ascensión convidamos a los nuestros llectores a que visiten na web del conceyu'l programa completu d'actividaes.