Trés conferencies y un recital de poesía conformen la Selmana Cultural Padre Galo

|

Cadavéu acueye dende esti vienres y hasta'l martes la selmana cultural que dedica la Sociedad Popular, Recreativa y Popular La Regalina a Fernán Coronas. El programa ta compuestu por trés conferencies y un recital, amás del fallu del premiu de poesía que lleva'l nome del escritor y una ufrienda floral.

La Casa Natal del Padre Galo va ser la sede de toles actividaes previstes nos cinco díes vinientes. El periodista y escritor Inaciu Galán va encargase d'abrir l'eventu mañana, a les 19 hores, cola conferencia 'Fernán Coronas ya la reivindicación del asturianu', mentes que'l sábadu, a la mesma hora, el convidáu va ser el tamién escritor Xuan Bello, que va falar de 'La excepción de Fernán Coronas'.

El domingu va aconceyar el xuráu del XXIII Premio de Poesía Fernán Coronas a les 17 hores, con fallu previstu del gallardón una hora depués. Darréu, a les 18.30 hores, va celebrase una ufrienda floral a ún de los autores más importantes de la nuesa lliteratura na primer metá del sieglu XX.

'Valdés, caminos y viajeros del siglo XIX'  ye'l nome de la conferencia que va poner, a les 19 hores del llunes, Lorenzo Fernández Rodríguez 'Gelo', profesor de Física y Química del IES Ḷḷuarca, mentes que'l martes, a la mesma hora, un recital d'obres del autor de Cadavéu va poner el ramu a la selmana cultural. Nesti eventu ta prevista la participación d'Esther Rubio, Esther García, Mari Rico y Xosé Manuel Fernández, que tamién van lleer poesíes propies y de Jesús Pérez Avello.

Contador Estadistiques